所以，好難怪追隨F1多年嘅車迷，好迷戀70、80年代嘅經典F1賽車。 其中，F1史上唯一一款六輪賽車——泰利爾（Tyrrell）車隊P34，更令人津津樂道。採用較小尺碼嘅輪胎，有助減少亂流，亦可以增加直路上嘅速度；當然，轉向系統亦因此變得複雜咗。無論點，P34夠膽想，亦做得出，的確係厲害，前無古人，後無來者。
呢部建基於田宮（Tamiya）F103底盤嘅P34，後輪驅動，已經喺七月下旬發售。車身有啲日文，唔係田宮設計師手痕加多筆，而係呢款P34，曾經出戰1976年世界一級方程式錦標賽日本分站（富士跑道），廠方話大尾翼規格都係跟返當時落場specs。咁像真嘅P34，我就唔捨得拎落街「放車」，喺屋企個廳郁吓就算，不過，四輪轉向（前輪）喺室內會唔會冇咁好軚呢？
