極速傳說 Koenigsegg Agera RS成全球最快量產車

以前想知朋友係咪正宗車迷，只需要叫佢三秒鐘之內串出瑞典超級跑車廠「Koenigsegg」個名，一試便知龍與鳳。1994年成立嘅Koenigsegg以「製造世界最快汽車」為宗旨，歷年黎多次挑戰「地面最快」嘅寶座，與Buggati同美國嘅Hennessey鬥得難分難解，頭銜數次易手。而近日就有人以Koenigsegg於2015年推出嘅Agera RS造出444.6km/h嘅平均時速，令其再次成為「世上最快汽車」！今次創下紀錄嘅係Koenigsegg嘅Test Driver Niklas Lilja，以及一部原裝，最大馬力1360匹、峰值扭力1011ft lb嘅Agera RS。佢哋於美國拉斯維加斯附近封咗一截長約18公里嘅直線公路，來回跑一次得出平均極速。其中去程嘅極速高達458km/h，回程因為有微斜以及對頭風，所以「只能」造出436.4km/h，兩程平均444.6km/h，正式打破Hennessey Venom GT於2014年創下嘅435km/h。