【911 Turbo S引擎移植】來自加國 920匹鷗翼超跑ICON

Photos: Anibal Automotive同你講加拿大有間擅長改裝保時捷（Porsche）嘅公司叫Anibal Automotive，真係未必知。 唔緊要，佢哋喺約四個月前公布名為ICON嘅超跑大計，呢款車限量生產50部，雖然冇講明係建基於乜嘢底盤，但憑住廠方近月陸續公布嘅video teaser分析，ICON好可能係建基於保時捷991型或997型911 Turbo。引擎方面，配911 Turbo S嘅3.8公升水平對向六汽缸Twin Turbo引擎，最大馬力聲稱可達920匹，四輪驅動，0至100km/h加速僅需2.4秒。咁極速呢？未有公布。ICON車身配鷗翼式車門，碳纖陶瓷碟，望望吓啲尾燈都幾似911喎，喂！咁ICON會唔會只不過係部「笠」咗套激改大包圍，裝咗對鷗翼車門同激改引擎嘅911 Turbo S咋？