最平 $9500 買到 256GB 亮黑版 iPhone 7！15 號凌晨有貨！
iPhone 7 與 iPhone 7 Plus，發布已一晚了，以買賣 iPhone 出名嘅旺角先達廣場，今日情況如何？版主行過，都有唔少舖頭門外都貼上可以預訂 iPhone 7 嘅單張。咁版主見到，就入去同店員吹下水、收下風啦！版主問過店員，佢地都話，今年焦點都係放係亮黑色度，而且預期仲會唔夠貨添！其實亮黑色係今年嘅 Hero
顏色，雖然有蘋果官方都承認嘅嚴重缺點，但因為太靚，就算蘋果手機代理，都已被告知好少貨，更何況係先達細舖呢？
店員指出，如果想預訂細機 iPhone 7，亮黑版 256GB 今日最新預訂價為 $9500，而大機 iPhone 7 Plus 亮黑 256GB 預訂價則為 $11200，並且 15/9 凌晨 1 點就會有貨，如果你可以等到咁夜的話，就可以即時取貨。不過就算俾你 15 號取到貨都好，但都無得用住，點都係要等到 16 號正式開賣之日，先至好 activate。雖然過萬，但以版主跟過咁多年 iPhone 開賣，呢個水貨開賣價，唔算最瘋狂，但肯定係貴。若你想搶先擁有 iPhone 7，呢個價，你又點睇？
先達店員：一定有得炒，第一批回收價有望 $15000
幾錢買唔重要，大家焦點應該係放在回收價上。版主向先達店員收過風，其中一個居然話，第一批 iPhone 7 Plus 亮黑色 256GB 回收價有機會會係 $13000，甚至有機會上到 $15000 回收。我哋減去原價，估計 iPhone 7 Plus 亮黑 256GB 版本可以賺嘅水位由 $5812 至 $6812。而另一間舖頭店員則表示，目前都未能確認 iPhone 7 的回收價，不過第一批有得賺基本上就係必然，初步估計回收價會比原價貴約兩三千吧！
係咪咁好賺，版主不作評論，亦不是鼓勵炒賣，呢個消息，信唔信，自己再想想。但都要提一下，聽日 9 / 9 iPhone 7 / 7 Plus 就會係 Apple Online Store (AOS) 開售，而 16/9 開賣日嘅 Apple Store 實體店買機 Quota
分配系統 I-Reserve 亦可能同時開放。對做 iPhone 貿易有興趣嘅網友，要注意了。
終於等到主角出場了！每年的 Apple 發布會，大家最關注的，應該都是新一代的 iPhone，而今年推出的 iPhone，亦如之前傳聞所說，叫做 iPhone 7 同埋 iPhone 7 Plus。咁外型方面又係唔係都同傳聞的一樣呢？經過 Apple 官方的確認，大家可以睇下，到底今年的 iPhone 7 系列有無睇頭。睇下文啦！
iPhone 7、iPhone 7 Plus 正式發表！邊隻顏色網友最 buy 呢？
上年的 iPhone 6s，就加入了受女性歡迎的玫瑰金色，今年又如何呢？有傳就會 iPhone 7 系列將會有五隻色，咁實情係唔係呢？Apple 官方公布，iPhone 7 系列的而且確係會有五種顏色，分別為玫瑰金、土豪金、白銀、磨砂黑以及光亮黑，其中的光亮黑，用上玻璃機面。但現有的太空灰，就不會用在 iPhone 7 上。不知網友最 buy 邊種顏色呢？相信不少網友都覺得光亮黑，亦即是之前所說的鋼琴黑，就連版主我都覺得，真係好靚，估計會係今代 iPhone 7 最好炒的一種顏色，你又覺得係唔係呢？
▲ 機背會有雙鏡頭、Apple Logo。
▲ 光亮黑機面非常光滑，望落去好靚，網友喜歡嗎？
▲ 支持 IP67 防水防塵功能。
