10個有8個香港人，生活上最大嘅問題就係土地問題，喺香港要有一個家，唔容易，不過係對大部分人嚟講。
因為大家總會喺新聞到見到新盤發售時，一方面大把人話貴話唔抵；
但一方面一推出就搶購一空，有無發現，其中一個傳媒焦點，就係「慈父」，
無錯，就係搵下有冇「好爸爸」係買樓送畀仔女，而往往都唔會呢令記者失望，因為真係大把。
畀記者捉到問到嘅大把，其實無被記者捉到仲有一大堆。試問年輕人可以真真正正唔靠父母而上車嘅有幾多？
討論區就有人出Post話，公司有個同事啱啱「憑自己儲嘅10萬，加上老豆嘅200萬，成功上車」，
之後自己就控制唔住不停黑佢面，覺得佢好乞人憎，仲問各位網民，對住呢啲父幹人，可以如何自處喎？
謾罵型
有人就話對父幹人唔需要客氣，明串又好暗鬧又好，總之就要鬧佢哋以洩心頭之憤。
雖然一定會畀人話「葡萄」或者「無口德」，大可回敬一句「鬧佢，佢會唔會無咗忽肉？」
已經無能力買樓，連鬧佢下咗啖氣都唔得？況且呢班父幹人有份令樓價居高不下，絕對並非無的放矢，抵鬧！
埋堆型
有人話呢啲有錢仔，返工都係賺錢買花戴，對錢銀隨時都唔多上心，不如藉故親近，做下酒肉朋友都好。
尤其係單身異性，即刻變成筍盤。而且幾時都話，多個朋友好過多過敵人，話唔定日後有咩事，佢哋係最有閒錢借畀你嘅人呢。
發奮圖強型
以佢哋為目標，唔係自己目標呀，係你第日個仔嘅目標，今日你唔可以靠父幹，就要希望你第時個仔可以有父幹。
所以要加油，努力成為一位富爸爸，將葡萄轉化為推動力！不過大前題係，你有錢生仔咩？
無視型
有父幹嘅人，其實眼中無你。等如，有父幹嘅人，根本唔會睇呢篇文、唔會上網睇有幾多人鬧佢哋、唔會睇新聞知上車有幾難。
有父幹嘅人，根本同你活喺唔同世界呀，無視佢哋算啦。
圖片來源：擷取自goyeah.com
