唔少男女結婚前都搞個告別單身party玩番晚，不過玩都要適可而止，如果好似呢位絲打咁，結婚之後發現老公喺婚前party疑似出軌真係喊都無用喇。呢位絲打近日喺討論區開po話婚後第二日，發現老公喺婚前party時同個女仔電話對話內容好曖昧，仲po埋啲對話出嚟︰
老公︰今晚飲酒
女︰無飲咁多
老公︰醉咗今晚一齊瞓
女︰留緊工
老公︰仲未收？
女︰有排呀
呢位絲打話睇到之後心到碎埋，仲嬲到推老公部電話掉落地，雖然佢老公解釋只係同朋友「開玩笑」，仲delete晒同呢位女仔啲對話，不過事情點會就此告一段落呢？絲打之後再發現老公同呢位女仔保持聯絡，仲齊齊數絲打不是添，絲打嬲到再次掉咗老公部電話落地，而呢根刺仲搞到佢成日以淚洗面。不過當佢再同老公重提呢件事，佢老公就反客為主發惡，話佢無理取鬧喎。
俗語都有話「一次不忠，百次不容」啦，所以唔少網友都叫佢同呢位「賤男」離婚兼分身家，當然有理智啲嘅網友叫佢心平氣和同老公傾，仲問絲打究竟想點？而呢位絲打就話佢老公現在避咗佢，仲話︰「唔打算離婚，老公又理解唔到，縱使心有不甘，所以我決定觀察，睇我老公會點做。」咁忍得？其他絲打們又會點做呢？
結婚後先發現老公婚前一晚疑似偷食咗，絲打心都碎埋。
遇到呢啲情況，大家點做？
當然唔少網友叫佢快啲同老公離婚啦！
不過絲打就話唔離婚，慢慢觀察老公喎，EQ真係好高！
