其中最值得留意嘅係頂級版M40i，佢配3公升直6渦輪增壓引擎，最大馬力360匹，峰值扭力51kgm，喺8前速自動波箱配合下，0至100km/h加速為4.8秒，極速250km/h。擺到撼奧迪（Audi）SQ5同平治GLC 43。
仲有冇其他電油引擎配搭呢？唔好意思，現階段係冇嘅，只有xDrive20d同xDrive30d，大家都知道香港喺今年10月1日，轉稱俗稱「加州例」嘅全新柴油私家車廢排檢驗標準，由於「加州例」相當嚴格，相信冇德國柴油私家車順利通過檢驗，一句到尾，唔使諗。咁香港嘅買家，係唔係要由M40i起錶？
定啲喎，照樣會有2公升直四Turbo版引擎，兩個輸出版本，一個184匹，一個252匹，加速性能表現料與目前採用同款引擎嘅5系房車差不多。而且仲會有sDrive後驅版添。
行李空間方面，未放平後座椅背，有550公升；放平後可增至1600公升，喂！唔鍾意（或你個market冇得賣）3系或5系旅行車，諗吓X3吖，啱啱完咗嗰代都幾好㗎。
