試完FK8之後思考咗幾日，加上睇咗一啲資料同訪問，真係覺得FK2造得有啲急，有少少「趕住交功課」。 但我覺得FK2有3樣嘢係幾「可愛」：外形，雖然呢個年代嘅Turbo Hatch，大大嚿，好難談得上動感或靚仔，但FK2硬係好似順眼過FK8，無得解，亦無須解。引擎，調校取向好清晰，要有自己風格，配備Turbo之後，仲係好有已往2公升自然吸氣VTEC引擎味道，整體運轉好順好輕快，中高轉好肯向上「飈」，儘管紅區起點喺7000rpm。FK2入彎好sharp，馬力雖有310匹，身型大咗咁多，仍然有高性能前驅車「車頭追住入彎」嘅優點，揸完之後，忍唔住講句，如果懸掛貼服啲，「冇咁跳」就好喇。
FK8外形並非本文討論重點，如果你話過佢似「掃把佬」，我希望你係「真心認同」，而唔係人講你又講。企喺車頭睇，FK8唔算大部，個人認為佢都算幾惡嘅。企喺車尾望，真係有啲論盡，車身好似幾長，如果唔係有隻咁大，線條咁誇張嘅擾流尾翼一早鎖住你焦點，第一眼望埋去已認定佢係一部中型fastback五門車。
FK8有三個行車模式，Comfort、Sport同「+R」，一著車預設係Sport，一如FK2，懸掛硬度、動力輔助多少同油門反應冇得獨立選配，喺今日嚟講，唔係個個接受到咁嘅「科技水平」，傳聞FK8喺進入生產期後半段，上述三方面都有得Mix & Match，等定唔等，你自己諗。
喺九龍灣、龍翔/呈祥道一帶，用Sport模式揸咗一段時間，比我想像中嘅貼服好多，即使硬，都冇FK2已往嗰種硬繃繃，喺黃大仙中心、永光書院、豐力樓、畢架山花園、大埔道交匯處一帶嘅混凝土路面，車頭好安穩。另外，後懸自身嘅震盪同運作噪音未有大幅度傳上車廂，尾輪亦好貼地，呢樣係值得拍多兩吓手掌。停車後無意中發現，後輪輪拱有一層表面狀似「絨毛布」嘅物料，相信有助抑制傳入車廂嘅胎噪。
轉去「+R」，行經鋪裝得好嘅柏油路，例如汀九段、青龍頭段、沙倉段青山公路，又或是北大嶼山高速公路，懸掛雖然硬咗好多，但仲保留住一丁點韌度，而呢一丁點韌度，正好喺駛過駁口位或渠蓋位時起咗緩衝作用，唔係話令你舒服到震，而係不致於令部車同你一齊「硬食」，愈揸愈辛苦。呢個狀態下嘅軚盤算係重，咁梗係啦，北大嶼山高速上限係110km/h，幾乎全部大直路，但我咁諗，如果喺trackday，你高速「嚿幾、兩嚿」喺賽道左片右片，呢個轉向力度/「重量」相信會啱啱好，出入彎都有信心好多。引擎反應比起comfort模式sharp好多好多，但感覺上同記憶所及，仍未及FK2嘅「+R」辛辣同急激，咁係好定唔好？我毫無疑問投向FK8嘅設定，儘管FK2「+R」模式殺氣騰騰，一大浸血腥味，但懸掛咁跳，想企穩啲揸定把刀絕非易事。
Comfort模式，懸掛的確係「舒服好多喇」，再具體啲，就係柔韌咗，要留意柔韌比重大概係3對7，喺舊山路輾過老化同起伏嘅柏油路面，仍然有少少彈跳。轉向、引擎，以至成部車嘅操作節奏都輕鬆得多，呢一刻嘅FK8絕對係一部sporty嘅家庭買餸車，但要批評嘅係：後排座椅嘅背墊同座墊嘅承托力只屬一般，有啲似坐喺Lancer Evolution RS喺後座，希望本田只係想籍此偷輕整體車重，唔係因為「孤寒兼慳皮」。
操控方面，FK8動態好平衡，與FK2「追住彎心殺入去」嘅取向明顯有別。可能係懸掛、轉向，以至其他機械細節嘅調校所致，FK8喺急速制動後扭軚入彎，總係畀你一種「車頭輕巧過FK2」嘅良好感覺。另外，喺全新懸掛格局之下，我總覺得後輪同前方驅動車輪合拍咗好多，唔單止係循跡咁簡單，喺窄啲嘅彎路，尾轆總係好肯追隨前輪嘅指向，並且加以配合。即使FK8係一部咁大馬力嘅前驅車，兼且冇四輪驅動，亦冇最新嘅torque vectoring或四輪轉向，但硬係覺得佢跑彎就係好靈活，轉向好準兼好輕鬆，而且駕駛者係隱隱感受到各個系統緊湊配合，你話軚感可以豐富啲就好喇。
本田將Civic Type R造大，變成300匹級數嘅高性能Turbo Hatch，我真係有擔心過，CTR日後難免被「大氣候」牽住走，下一代會唔會有dual clutch自動波或增配四輪驅動？呢啲唔係「諗得太多」，事實亦無得你驚，有辦你睇，NSX可以都變成配Hybrid、Twin Turbo引擎兼只得自動波。「喂！阿John，NSX還NSX；Civic還Civic，兩回事嚟嘅！」我都希望係咁。
Honda Civic Type R（FK8）規格售價：約59萬元（2018年車）代理：Reliance Motors www.honda.com.hk車型：五門四座體積：（長）4560mm x （闊 ）1875mm x （高）1435mm軸距：2700mm引擎形式：1996c.c. 直列4汽缸，缸內直噴，前置引擎馬力：310匹/6500rpm（使用95辛烷值電油）;320匹/6500rpm（使用97辛烷值電油）扭力：40.8kgm/2500-4500rpm波箱：6前速手動，前輪驅動懸掛：（前）麥花臣支柱；（後）多連桿車重：1387kg
0至100km/h加速：5.7秒極速（km/h）：270km/h耗油：8.8L/100km
輪胎：Continental Sport Contact 6 245/30 R20
