【唔打得都睇得】Rezvani 「Tank」500匹嘅SUV

Rezvani係美國加州細車廠，過往幾年先後推出過跑車Beast Alpha同Beast X，個樣呢，係幾有話題嘅。最近佢哋發表稱為Tank嘅SUV，個樣好有裝甲車味道，「嚇到鬼」。Tank嘅底盤來自Jeep Wrangler，屬五門掀背格局，買家可配3.6公升V6或6.4公升V8引擎，後者最大馬力達500匹，峰值扭力59kgm。Tank唔係採用全時四驅，只係配part time 4WD，唉！硬係覺得個specs少少。Tank最有話題之一，係可以選配防彈玻璃、軍用級數嘅防爆車胎、車身配備Kevlar物料，能夠避彈；另外油缸、地台、水箱亦用Kevlar物料包裹。買家亦可加裝夜視系統，雖然仲未達到手榴彈抗爆級數，但喺啲周街壞人嘅九反地帶，點都安全過一般嘅私家車。車價方面，18萬美元起錶，即約140萬港元。老實講，我唔係好信得過呢間嘢，買嚟當型仔SUV揸吓就算，祝願世界和平。